«Vus dessas esser sontgs, perquai che jau sun sontg, il Segner, voss Dieu.» (Leviticus 19,2)

Ina persuna - trais fatschas. En la baselgia da Lavin en Engiadina Bassa datti en il cor picturà ina figura speziala: quella ta guarda adina! Ella ha in chau, ma trais fatschas. Ella represchenta la Trinitad. E cun quai nossa cretta cristiana, che nus crajain bain en IN Dieu, che sa mussa dentant sut differents aspects. Nus exprimin quai cun ils pleds: «Nus crajain en Dieu il Bab, il Figl ed il Sontg Spiert.»

Bab e Figl. Dieu, il Creatur e Bab en tschiel, quai è cler. El è la basa da tutta existenza. Er Jesus Cristus è concret. Sia vita istorica e ses pleds dattan buns exempels er anc per nossa vita dal mintgadi. Ma cun quai ch´el ha vivì avant 2000 onns en in pajais lontan, tutga el tar il passà. U alura insacura tar l´avegnir, perquai ch´el ha da revegnir!

Dumondas. Ma tge va quai tiers nus, che vivain oz? Co duain nus viver tranter il passà da las istorgias bib- licas - e l´avegnir dal nov Advent da Jesus Cristus e nossa nova vita empermessa per suenter la mort? Sin quai dat Tschuncaisma ina resposta. Il Sontg Spiert è quella furma da Dieu che accumpogna nus oz e qua! - Co quai?

Gia vegl. En ina visiun passa 500 onns a. C. aveva il profet Ezechiel vis la situaziun catastrofala da ses pievel da quella giada. E latiers ha el udì pleds da Dieu che empermetta da vulair sez sanar questa situaziun: «Jau as vi dar in nov cor! … Jau vi metter MES flad da vita (nus pudain er dir: mes spiert) en vus … per che vus conuschias che jau sun il Segner!» (Ez 36s).

Fieu e flomma. Quest´ empermissiun è s´accumplì suenter Pasca. Ils giuvnals vegnan emplenids cun in schlantsch superiur. Els na vivan betg pli mo en il passà cun las istorgias da lur pievel cun Dieu e cun lur bellas regurdientschas vi da Jesus Cristus.

Suprigliar Responsabladad. Ed els na vivan er betg sulettamain en l´avegnir spetgond che las empermissiuns vegnan a s´accumplir. Els san ussa tge far qua ed oz: Els raquintan da las ovras da Dieu, surtut er en e cun Jesus Cristus, ed: Els emprovan da viver or da l´amur da Dieu - e da la dar vinavant a lur conumans.

Nus essan sontgs. Tuttenina hani realisà, tge che Dieu aveva adina pretais da ses pievel. En la Bibla vegn descrit, sco che tut quai che tutga a Dieu è «sontg». «Vus dessas esser sontgs, perquai che jau sun sontg!» empermetta perquai: Vus tutgais tar mai! Vus essas mes uffants! Ma alura pretenda quai er: As cumportai lasuenter!

Viver. Sco che Jesus di en sia pregia sin il munt: «Vossa glisch sto splendurar davant la glieud: els duain vesair voss fatgs e ludar voss Bab en tschiel!» (Mt 5, 16). Il Sontg Spiert è damai Dieu sez per mintgin da nus ed en nus - e noss viver lasuenter!

Pregià ils 23 da matg a Valchava e Sta. Maria ed ils 6 da zercladur en il Radio Rumantsch.